Lou saunéy dous trés petits càssous

Posté par ethbaretounes le 23 décembre 2012

Lou saunéy dous trés petits càssous

Û die héns lou bos trés petits càssous que parlaben de ço qui hasoùrẹn déths quoan estéren baduts grans, e cadû e disè souns proujéts, souns saunéys.

Lou permè esmabut per la luts e las estéles que disèbe : « You quoan sìey badut gran que bouleri que-m transfourmèssẹn en « coffre à bijoux », enta-y hica lous méys beroys dou moùndẹ !… » 

Lou segoun qui aymabe bédẹ lou reflèt dous lugras sus las aygues clares de l’arriu que disèbe : « You quoan sìey badut gran que bouleri que hasoùssẹn de you û gran trés mats enta nabiga sus toutes las mas dou moùndẹ !… »

Lou tresau qui-s plasèbe à espia las luts misteriouses de las candèles déns lous oélhs dous maynats lous dies de grane hèste que disèbe : « You que bouleri bàdẹ hère gran, talamén gran que quoan lou moùndẹ e m’espièssẹn, qu’aboùssẹn à lheba lou cap tout haut e que pensèssẹn au cèu e au Boun Diu !… »

Lous printéms, lous ibèrs, lous estius que passèn lountéms, lountéms… E per û bèth die d’abor, trés bucheroûs que hasoun càdẹ lous trés càssous à grans cops de pioles, qu’ous debiten e qu’ous amien dap trés muléts en û arressegàyrẹ.

Debath la soûe pèth cadû, adare cassourre, que-s imaginabe soun hat à la soûe fayçoû !… E finalamén lou qui auré boulut esta « coffre à bijoux » que feni minyadére à bestia, lou qui auré boulut esta û trés mats que debiengou ûe barque de pescadou, e lou tresau qu’estou debitat en granes pèces e hicat à seca enço d’û menusè.

Lous ans que passèn e lous trés càssous que s’abèn desbroumbat lous lous saunéys, quoan per ûe noéyt d’ibèr ûe douce luts d’estéle que-s pausè sus la minyadére e sus û drin de hé, ûe yoéne hémne que hasou bàdẹ û maynat, soun pay qu’ou hiquè déns la minyadére troussat héns û linçòu. Û sé d’estiu ûe troupe d’òmis que bouloun trabersa û lac dap la barque de pescadou, ûe horte tempèste que-s lhebè e pensè hat-bira tout déns l’aygue, més û d’éths qui semblabe esta lou mèstẹ qu’estenou lous bras e la tempèste que-s calmè. Quoan à las pèces hicades à seca, ûe hourère d’òmis que las prengou enta-n ha ûe crouts enta crucifia lou hilh de Diu.

Qu’éy atau que-s realisèn lous saunéys dous trés petits càssous, lou permè ne poudè pas abé miélhẹ tresor héns la minyadère, lou segoun û capitène de barque dous méy abisats e lou tresau cade cop qui l’espiaben que pensaben à Diu.

Qu’éy doun permetut de sauneya !…

Andrèu de Sarramoune

Coùntẹ primat aus Yocs Flouraus 2012

de l’Institut Biarnés e Gascoû

3 Réponses à “Lou saunéy dous trés petits càssous”

  1. cazenave dit :

    .. qu’ey ataù que coumpréni lou béarnés… se y’abè moyen d’en trouba d’aùtés countés que seri hort counten , qu’en hè belléù tourna quate-bints ans en d’arrè.. qu’èro ua lenga méi riché qué lou francès .. merci et adichats .. ***paapy***

  2. Lambert dit :

    J’ai découvert ce texte , mais n’étant pas Béarnais , j’aurais aimé le comprendre … en Français !!!
    Merci d’avance

  3. ethbaretounes dit :

    Voulez-vous une traduction complète ou quelques explications de vocabulaire?

Laisser un commentaire

 

zakariahammoumi |
Science pour Tous |
ekinox21 |
Unblog.fr | Créer un blog | Annuaire | Signaler un abus | L'individu et le groupe
| jqsmouanjo
| Cours d'anglais