LAS COUMUNAUTATS

 

 

    Dou téms oun èrem escouliès, à l’ore de-s debertì, que hàsem dus ligots enta ue partide de « tchoure ». Lou yoc qu’ère sìmplẹ, que calè embià lou baloû-ou ço qui-s y semblàbẹ-déns lou « but » d’en face. Noû y abè pas tan de camaligues coum au rugbi. Lou soul chiulet qui-s entenè qu’ère lou dou reyén qui amatigàbe lou yoc quoàn s’èren enmaliciàts. Per la fî, qu’ère la campanéte qui-ns e hasè tournà repréne l’escole.

    Lous yournalìstẹs qui espliquén las partides de la « Seccioû Pauline » au prat dou Hamèu que disén que soun las campanes qui anouncén la fî dou match. Més noû, que soun las esquires, e ço qui apèren « cloches » que serén meylèu lous yougadoùs estros ou lous yournalìstẹs desestrucs enta countà la partide.

    A l’escole, quoàn calè ha lous ligots de yougà, qu’èren lous méy horts qui at hasén, e nat n’aberé gausat dìsẹ de quin coustat e l’agraderé de yougà. Que calè crédẹ…e carà-s.

    En tout cas, la partide que-s hasè enter lous màyẹs qui àben hèyt las equipes chens s’aucupà dous autẹs qui-us courrèn au darrè. Qu’ère la léy dou méy hort la daune. Ne troubat pas qu’éy drin atau las coumunautàts de coumunes qui hèn aquéstẹ an ? Entà quauques ues, arré de cambiat.

    Més entà las autes ? Que y a coumunes qui boulerén las de capsus, d’autes, las besies de l’estrém. Quauques biarnéses que-s boulerén yuntà dab las de Bigorre, més aquestes n’at bolìn pas.

    Aco que hè biscà lou prefèt. Lous yougadoùs que-s an à descidà bistẹ, permou que, passat las bacances, que darà lou cop de chiulét ta hà yougà amasse las ues e las autes.

 

Û DE LA BATBIELLE